Pagina:Attilio Turco - Sonetti Veronesi.djvu/35

Sta pagina la xe stà trascrita, ma la gà ancora da vegner rileta.
GNENTE MISERIE!


No’ la de vol miserie me morosa,
     Tanti la ciapa e tanti la de spende!
     Par via de magnar ben la se ne intende
     E 'n te ’l vestir l’è pèso de ’na sposa.

La gà 'na siarpa verde e n’antra rosa;
     Un corpelin sbusà come le tende,
     Còtole1 larghe e strete senza mende
     E stivalini al par de ’na mafiosa!

Tuti i giorni ghe piase andar a spasso
     In tran, in automobile o in carossa,
     A piè, fioi cari, gnanca se i la strossa;

Savio, parchè? par no tacarse a brasso!
     Ma invesse, se anca proprio no l'è straca,
     Quando no’ la g’à bessi... la se taca!

  1. còtole - sottane.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Attilio_Turco_-_Sonetti_Veronesi.djvu/35&oldid=71420"