IN ÇERCA DE CASA
— El senta, sior paron, m'è stado dito,
Che qua gh'è da 'fitar ’n apartamento...
Se pol darghe n’ociada?1 E’-lo contento?
Ci sa che no’ podemo far pulito.
— Si ’l se comoda pura, in sto momento
Gh'è su 'l pitor che ’l termina un sofito...
— E quanti loghi?, e quanto è-lo l’afito?...
— J-è quatro loghi e al mese j’è... tresento!
— Tresento franchi sior? ultimo buso?2
— Par lu ghe ’l ridurò a dosentotanta!...
— A no, par carità... Madona santa!...
A far brute figure no son uso!
No’ l’è n’apartamento par la quale...
Fasso de manco, sior, de far le scale! —
