LUNA DE MIEL
Se pol contar dei albari le foie?
Se pol contar le spine de le sese?1
Se pol savèr quante le sia le voie,
De ’na sposeta, maridà da un mese?
Nel so servel ci sa cossa ghe boie?...
Na voia mata de far nove spese,
Un gran piasser de rancurarse noie,
E la superbia de vantar pretese!
El sposeto, quel poro desgrassiado,
Se la luna de miei la ghe sa cara,
Bison che ’l mostra de no darghe bado...
Ala rassegnassion che ’l se prepara,
Col dir: mea culpa! ormai ghe son cascado
Se no se proa... purtropo, no se impara!
- ↑ sese ― siepi.
