Pagina:Attilio Turco - Sonetti Veronesi.djvu/76

PASQUA

L’è la più bela festa che ghe sia,
     La Pasqua: la ne porta Primavera
     E la ne mete intorno un’alegria,
     Che a un mio¹ distante, se ne lese in siera

Ogni casa l’à fatto pulissia:
     Gh’è lustri i rami, i veri e lustro in tera;
     Emo sercado de cassarlo via
     Un roseghin dal nostro cor, se ’l gh'era.

Par podèrse sentar a tola chieti,²
     Davanti a un bel piaton de paparele,
     Coronà da ’na fila de paneti....

E al ciaro de un bel fiasco de quel... bon,
     Co’l manzo, el rosto e quatro brassadele...³
     Butar tuti i pensieri in t’un canton!

1. mio ― miglio;
2. chieti ― tranquilli.
3. brassadele ― ciambelle;