EL CARNEVAL DEL 1915
Ecolo qua, 'sto carneval, fioi cari,
Che ’l va de corsa verso me-la-moco;1
St’ano, par via de serti bruti afari,
L’è proprio un carneval serio e pitoco!
'Na volta, me recordo, gh'era i cari,2
Le mascarade, col papà del gnoco;
Ciapava bessi tuti i botegari
E anca i pitochi i se godeva un poco...
E gh’era i canti, i soni e le ciassade
E i cori che cantava par le strade...
Oh! come adesso i tempi iè cambiadi!
’Sti zovenoti i taca3 a farse seri:
Ghemo le mame piene de pensieri
E le caserme piene de soldadi!...
