I.
El fredo de Siberia.
********
Me diseva un amigo, e ghe lo credo,
Che cussì grando xe in Siberia el fredo,
Che le parole apena pronunziae
Le vien fora ingiazzae,
Nè podè mai capir
Quel che i ve vogia dir.
Ma la matina drio
Quando se verze i scuri,
E che 'l sol scalda i muri,
Scomenza un mormorio
Che in t'un momento se fa grando assae,
E co tute ste ose desgiazzae
Se fa una babilonia maledeta. —
Per dir la verità la xe grandeta,
Ma l'à contada un omo che à viazà,
El dise che l'è stà
Testimonio ocular,
Dunque no xe permesso dubitar.
