XLIX
Vorave che tornasse el tempo ancora
Che via se andava in peto co la crose,
E co se gera de sti porti fora,
La nostra stela deventava el dose;
Stela che nu portevimo dessora
Coi sforzi del valor, e co la ose,
A la luna infedel de quel Maometo,
Che ciga Alà co 'l vede crose in peto.
L
Adio, bela Venezia, adio laguna,
Adio, care putele veneziane;
Mi vago a misurarme co la luna,
Vago a farghe paura a le sultane;
Ma tornarò onorato e in gran fortuna
A sti porti, a ste rive, a ste cavane;
E a dirve ancora tornarò: putele
Ve voi più ben, se' deventae più bele!
