L'INVERNO
Gera d'Inverno, e gera in compagnia,
E xe sta messo in campo la question,
Se de l'Istà l'Inverno megio sia,
Lassando fora l'altre do Stagion;
Che la gran moda adesso xe i estremi,
6E drio la moda se propone i temi.
E voltandose a mi: — Vu che avè fato
Più volte le Stagion, me dise un tal,
Cossa ve par? l'Inverno ad ogni pato
Xe megio de l'Istà, l'è natural,
Ma no me fe parlar la fantasia,
12Trovè fora rason e no poesia. —
— Mile grazïe, ò risposto, ma no posso,
Che mi co la rason no me ne intrigo,
L'è tropo disgraziada, e ò visto in fosso
Per causa soa ai mii dì più d'un amigo,
E se la vol che diga, la permeta
18Che diga el mio pensier, ma da poeta —
