CONTRO UN FAMOSO STOCCHIZZANTE
Oh quanti, oh quanti ghe n’ò visto mai
Per man del Boja su la forca in Piazza!
Oh quanti ghe n’ò visto de sta razza,
4Dopo tagià la testa, desquartai!
Oh quanti a la Berlina condanai
Tior su pomade e vituperj in fazza!
Quanti per poco più d’una lirazza
8Ghe n’ò visto in Galìa, dopo frustai!
Ma za che in sto paese ogni assassin
Incontra o presto o tardi el so castigo,
11Cossa feu del famoso sior Santin?
Che scanandove fioi, mugier, amigo,
Sudito, Forestier, e Citadin
14Almanco almanco nol mandè a Cerigo?
