EPIGRAMMI
I. Il consulto
Sior Schieson, un Consulto. A un certo tal
Certi no so che bezzi mi ò da dar;
Son povaromo; i fati mii va mal;
Come possoi mo far a no pagar?
Fèla a la granda, amigo, prometè,
E a la promessa po' no ghe atendè.
II. L'amor proprio
Co una ragazza se vede dar 'na ochiada
Da qualche zerbinoto Paregin,
Subito crede vegnir domandada,
E la camisa no ghe sta al martin:
Ma s'anca el sior Schieson fusse una tosa
El credarìa anca lu la stessa cosa.
III. Il Vecchio innamorato
Co un pie in te la fossa Crasitèo,
E con el viso tuto incresponà,
Fa ancora a più poder el cicisbeo,
Povero cuco, ti me fa pecà!
Amor (e questo è Schiesonian aviso)
No gabia in cuor chi no lo ga in tel viso.
