1Mentre al tropico oposto el Sol se inalza,
E i benedeti influssi el ghe comparte,
E al nostro invece el duro inverno incalza,
E par morta natura in ogni parte;
Mentre el vilan se stropa su e se calza,
E a le fenestre mete su le carte,
Co i campi è muti, e co la neve e 'l vento
Per tuto sbrufa, e vien per tuto drento;
2L'inzegno Citadin, che sempre tenta
De vincer la Natura ad ogni costo,
Radopia i sforzi, e gnente lo spaventa;
El vol che sia in Cità tuto a l'oposto;
No xe che za nol veda, e che nol senta;
Natura mai non abandona el posto;
Ma 'l maschera, el compensa, el colorisse;
El se ilude, l'ilude, e 'l se aplaudisse.
3Intanto perchè i dì xe tristi e scuri
Lu fa che i zorni ghe deventi note;
E 'l sono e i sogni, a torto diti impuri,
Che 'l delizioso sugo de la bote,
