O sbalo sconto, o posta radopiada,
Ma qualche volta el caso se fa bruto;
Perchè la se scoverse, e al duro passo
Se se strapazza, e se fa un po' de chiasso:
25Ste cosse rende viva l'adunanza,
E dà logo a graziose satirete.
Per la bela qualcun tol su la lanza,
Che s'à sconto el Panfil ne le carpete,
E acusa un'altra che gavea l'usanza
De butar via sbalando un quatro, un sete:
Ste satire, sto acuse, sto fermento,
Xe de molti Casini l'ornamento.
26Tuti per altro no xe a questi uguali,
Ghe n'è de quei che se pol dir Licei,
La saviezza, onestà, chiari natali,
Casta belezza, purità da Dei,
Spirito sodo, grazie naturali
Vive e trionfa. Oh questi po xe bei!
In questi se se' degno andeghe drento
E vedarè che restarè contento.
27Xe cinque boti, e del paradiseto
La fola a poco poco se schiarisce:
Che coteghi! a cinqu'ore andar in leto?
Cria do, tre done, e st'altri ghe aplaudisse.
Se scherza su sto massimo difeto,
Una nova partia se stabilisse:
Che se ghe chiama la partia barona,
E se finisse co i matini sona.
