VII
Vaga a Venezia subito a dretura
Chi vol aver motivo de stupor,
E veder vol cossa sa far Natura
4Co' in impegno la xe de farse onor.
Venezia solo de sta gran ventura
Xe stà degna, e la à bu sto gran favor;
Là ghe xe la più bela so fatura,
8La magior prova del so gran valor.
El vedarà una Drezza de Cavei
De undese quarte, dei più fini e biondi,
11Dei più rizzi, più folti, e dei più bei.
E scometo per sbrio l'istessa testa,
Che no se pol trovar per tuti i mondi
14Cossa più bela e rara più de questa.
