XIII
Chi mai se l'averave imaginada
Che mi dovesse ne la prima volta
Che ò visto quela bela Drezza sciolta
4Bruscar sto boconzin de inamorada?
Col so deeto Amor me l'à mostrada,
E mi inocentemente in man l'ò tiolta,
E in quel che la vardava, el can se volta,
8E in cuor me cazza, oh Dio! la gran stocada;
Cussì finzendo placida bonazza
El mar cordona i curti barcarioi,
11E nei scogi la barca po el ghe strazza.
Scampè da Amor, no credè ai scherzi soi,
E in mi spechiève, zoventù matazza,
14Che co' manco el credea go dà nei chioi.
