XXXVII
Un Cavel porporin che in testa avea
El potente Re Niso de Megara,
Del destin dei so Stati decidea,
4Ma so fia Scila ghe l'à fata amara.
Per Minosse d'amor tanto la ardea,
Che no la ga badà, sta cagna avara,
In t'una note che 'l Papà dormea,
8De pelarghelo da la cavegiara.
Ghe dependea da quel fatal Cavelo
L'ecidio de quel Regno, o pur la sorte;
11Richezza e pase, o povertà e flazelo.
Ah! che anca mi provo un destin ugual
A quelo de Megara, e vita o morte
14Le me depende da un Cavel fatal!
