XL
Go sentìo dir che 'l Spirito Foleto
Per el più se inamora dei Cavei,
E che 'l va in cerca dei più longhi e bei,
4Mosso da un certo natural deleto;
E che 'l ghe chiapa un cussì mato afeto,
E che talmente 'l se incatigia in quei,
Che no val tante volte l'Agnusdei
8A cazzarghelo via quel maledeto.
Mi somegio a colù tanto in natura,
Che d'esser un Foleto in carne umana,
11Per dia, che squasi squasi go paura.
Anca mi in dei Cavei son morto e spanto,
E gnanca a mi, per far che me slontana,
14Gnente à mai valso, e pur go fato tanto!
