XLV
Netuno, perso anca elo un dì el giudizio,
Incotìo ne la povera Medusa,
Nel tempio de Minerva a la refusa,
4Senza respeto fato el gh'à el servizio.
Sto sacrilegio in tanto precipizio
Fa andar la Dea che tuto la recusa,
De Netuno no val preghiera o scusa,
8E la vol condanarlo a un gran suplizio.
I Cavei ghe fa bisse deventar,
E che de chi la varda sia l'acquisto,
11Ch'i abia in bota de sasso da restar.
Dei Cavei de sta grama al fatal bisto,
Nina, anca i toi ben posso somegiar,
14Perchè son restà un sasso co' i go visto.
