L
Se a sta Drezza, cressua per tormentarme,
El dì intiero pensando e peno e ranco,
La me lassasse, co xe note almanco,
4Qualche per d'ore quieto repossarme!
Ma o che smanio, o che tendo a smissiolarme
Ora sul brazzo dreto, ora sul zanco,
O che se dormo, tach, a muso franco
8La cor de sbalzo i soni a desturbarme.
Quante volte de lagreme bombà
Tuto ò catà el cussin! Oh Dio co spesso
11In ato de zigar m'ò desmissià!
Per sbrio, che co' me meto a far reflesso
Al me stato, e a sta Coa senza pietà,
14Pecà proprio me fazzo mi a mi stesso.
