LIX
No che genio no 'l xe, nè simpatia
Sto gran trasporto, sta passion che sento,
No, no xe natural sto gran tormento;
4Per mi la go per una strigarìa.
Certo qualche vechiazza maledìa,
Qualcossa in quela Coa gh'à ficà drento;
No ve dirò, se sughi o pur unguento,
8Ma certo qualche gran rebaldarìa.
In te 'l darghe la sola prima ochiada,
M'ò sentio strassinar a inamorarme:
11Eh sì che za la gera faturada!
E se la xe cussì, cossa òi da farme?
Chi mai me insegna per pietà la strada
14Da sto strighezzo, oh Dio! per liberarme?
