LXVI
Cazzeme fra quei poveri giazzai,
Dove 'l gran fredo i mari inzepa i ingoa,
Metime fra quei grami cusinai,
4Dove l'ardente Sol più scota e broa;
Fame 'l più desperà fra i desperai,
Opur che fra i zechini sguazza e noa,
Sucèda quel che pol suceder mai,
8Mi mai me scordarò de la to Coa.
Ti vedarà coi lovi insieme i agnei
Pascolar, e coi gati i can zogar,
11Per aria i pessi, e andar per acqua i osei,
Dal Cielo fiocar zo la neve mora,
Bagnar el fogo, e 'l Sol l'acqua sugar,
14Prima che me la scorda, e no la adora.
