LXXXI
Bisogna ai Frati infin darghe rason,
Se tanto i bate saldo, e tanto i ziga,
Se à consegiarne tanto i se sfadiga,
4Che schivemo la prossima ocasion.
Benchè no se fazza reflession,
Questa xe la mazor nostra nemiga,
E facilmente ne la colpa antiga
8La ne fa recascar de rabalton.
In mi stesso la provo chiara e schieta;
La cause che m'à fato scapuzzar
11Xe sta aver visto i to Cavei, Nineta;
E ogni qual volta mi li torno a ochiar,
Ecola la ocasion stramaledeta;
14Per cussì dir, me torno a inamorar.
