LXXXIV
Trasportà dal pensier, che sempre tristo
No pol za partorir che bruti intrighi,
Me son catà, nè certo go stravisto,
4De l'Inferno tra i oridi castighi.
Gran Dio, che tananai! Gran Dio, che misto
De lamenti, de pianti, de urli e cighi!
Furie, diavoli, strighe, orchi go visto,
8De solfor sbampolae, fumi, calighi.
Visto un logheto, come xe una stua,
Gh'ò domandà: Chi à da vegnirghe a star?
11— Una superba se no la se mua.
A sta resposta cussì brusca e acerba
Per ti m'ò sentìo, Nina, el cuor tremar,
14Che quela Coa te fa tanto superba.
