Scartabelando i so registri, un zorno
La Morte à trovà un rosto! A conti fati,
Secondo el so caprizio, un certo vechio,
Deto barba Simon,
5Doveva da vint'ani
Far tera da bocali; e con bravura
Se scrocava la vita: A mi (la dise)
Te vegno a consolar le mie raise!
E la tol suso la so brava falce,
10La ghe dà 'l filo in pressa, e la sgambeta
Per cucarselo in casa a cavalier;
La branca con dispèto el bataor,
E la dà una batua da creditor.
Barba Simon gera andà giusto in caneva
15A spinarse una bote. A quel fracasso
El lassa tuto, el core, el sbalza su,
El spalanca la porta: Vita mia,
Un'altra volta (el dise) batè a pian,
Che za go bona rechia.
20Oh, via, chi seu? cossa ve casca, vechia? —
