Pagina:Collezione delle migliori opere scritte in dialetto veneziano 8.djvu/24

Sta pagina la xe stà trascrita, ma la gà ancora da vegner rileta.

     45Son in mezo a la Gazera e Zegian.
E se go vogia mai de caminar,
     Chirignago, Spinea, Mestre e Noal
     48Posso con poca strada visitar.
Governante fedel, mia comensal
     Go una puta che lava e me tien neto;
     51Ne gh'è, te lo protesto, ombra de mal.
Un palazzo incantà me dà riceto,
     Digo incantà, perchè senz'esser mio
     54Ziro da l'altro al basso, e go un bon leto.
Co se leva le zeleghe dal nìo
     De sentirle a cantar no me ne importa
     57Ma stago nel mio cuzzo impoltronìo,
Finchè la puta un bon cafè me porta,
     Che vero de Levante e fato ben,
     60Me svegia sul momento e me conforta.
Domando se xe nuvolo o seren,
     Nè de levarme su no trovo el quia
     63Se a redosso le nove no me vien.
Chiamo alora la puta, e digo: Fia,
     Me sento pien de cuor, qua le zavate,
     66Parechime el frontin, chiò la tachìa.
Dago l'ultima ochiada a le beate
     Coltre, che per nov'ore m'à coverto,
     69E porto fora a stento le culate.
Ma prima de andar zoso a cielo averto,
     Spalanco de la camera un balcon,
     72E de l'aria che fa cussì me acerto.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Collezione_delle_migliori_opere_scritte_in_dialetto_veneziano_8.djvu/24&oldid=67270"