AL FRATELLO DELLA SPOSA
PROPRIETARIO
DEL TEATRO DI S. LUCA
In sti set'ani, che con mio contento
Servo Ca Vendramin, averò scrito
Pur Muneghe o Novizze più de cento,
E tra de mi più de una volta ò dito:
Quando Ca Vendramin farà fonzion,
Bisogna far qualcossa de pulito.
Oltre el piaser, ghe xe l'obligazion,
E per grazia e per lege e per afeto.
So Zelenza Francesco è mio Paron.
E ela, Sier Alvise benedeto,
So che la ga per mi tanto bon cuor
Che l'ocasion de ringraziarla aspeto.
El caso xe vegnù. Nostro Signor
À chiamà la Sorela al monestier;
Questo el tempo sarìa de farme onor.
Ma sul ponto de far el mio dover,
Vien la freve terzana a desturbarme,
E go altro, per dirla, in tel pensier.
4
