Dove se arleva i fioi, co i xe puteli,
Con santissimi onesti sentimenti
A la patria divoti e a Dio fedeli;
Tuti a l'onor de la famegia intenti,
Nemici de la zente indegna e trista,
Schivando le pazzìe dei Malcontenti.
In sta tal mia Comedia ò messo in vista
L'ambizion de chi fa quel che no pol,
E el disonor che per tal via se aquista.
Ò fato veder chiaro come el Sol,
De la zente superba el precepizio,
E so de certo che a qualcun ghe diol.
Ma in casa Vendramin no gh'è sto vizio;
Tuti xe boni, tuti xe discreti,
E fin la servitù ga bon giudizio.
Zente in casa no i tien con quei difeti,
Che in te le mie Massere ò colorìo,
Piene de vizj e piene de grileti.
So Zelenza Francesco savio e pio
Vol che la servitù se toga spasso,
Ma onestamente e col timor de Dio,
Quando i paroni fa baldoria e chiasso,
Anca a la servitù, per consueto,
Par che sia tuti i zorni el zioba grasso.
Oh quanti ghe ne xe che per dileto
Se vol redur de la miseria al fondo,
Dando ai magnoni e ai discoli riceto!
