Pagina:Collezione delle migliori opere scritte in dialetto veneziano 9.djvu/75

Sta pagina la xe stà trascrita e rileta.


Squasi (responde Amor) squasi dirìa,
     Sior sì, che el vegna. Salta su Diana:
     Fursi fursi anca a mi me quadrerìa,
     Ma no saveu l'usanza Veneziana?
     Qua una Puta se tien con gelosìa,
     La se fa star dai zoveni lontana;
     Quando che no se vede una signora,
     Chi diavolo voleu che s'inamora?

Dise el bravo Imeneo: Madona sì,
     So l'usanza, la lodo, e la sta ben;
     Ma su sto fato lassè far a mi;
     Mi so quel che ghe vol, quel che convien.
     Donca restemo tra de nu cussì;
     Sospendè finchè torno ogni velen;
     In ste cosse ch'è qua, se fa e se tase.
     Saremo amici, e torneremo in pase.

Morsegandose el deo, parte Cupido,
     La Dea ride disendo: oh povereto!
     Amor va a saetar de lido in lido,
     Se retira quel'altra in t'un boscheto.
     E fratanto Imeneo costante e fido
     Va sta facenda a manizar secreto;
     Ai parenti, ai amici el parla in rechia,
     E a proposte, e a risposte el se parechia.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Collezione_delle_migliori_opere_scritte_in_dialetto_veneziano_9.djvu/75&oldid=66832"