Se conclude el Contrato, e quando el sente
El Bonfadini a nominar sta Puta,
L'orida imprecazion ghe vien in mente,
El resta storno e co la lengua muta.
E el dise tra de lu: Mo che acidente!
Se stupirìa chi la savesse tuta!
E nol sa, che da Amor l'è sta sentìo,
E che farghe el vorìa pagar el fio.
Nol responde de no, perchè se trata
De una Famegia che lu stima e onora,
E cussì facilmente no se cata
De sti boni partii, nè qua, nè fora.
No se pol retirar parola data,
Ma cussì a orbon nol ghe vol ben gnancora,
E no ghe basta a Amor ch'el sia ligà,
Coto el vol che el se veda e brustolà.
Se recorda Imeneo del preso impegno,
E ghe preme l'onor del camerada.
L'à scielto con decoro e con inzegno,
Perchè insieme i se trova, una zornada.
Ah! col l'à vista, Amor xe arivà al segno.
Ah! el s'à dà sto bocon de cusinada
Che a casa imatonio, co l'è tornà,
El criava per strada: Amor, pietà.
