- 6.
Ma pióve!... Zò; in çità! Fòra de casa
là, almanco, se camína su la piera;
quele che passa da matina a sera
xe facie conossue. Uno te basa;
st'altro te abrazza; mai nissun che tasa
sul piasér de trovarte in bona çiera,
grasso, rinzovanío...; 'na tiritera
longa eterna; la par una fornasa
de amor co' tante fiame che te assedia...
E ti volevi, povaro mincion,
sepelírte adretura in mezzo ai campi!?
Ma tute quele feste xe comedia,
parole a flor de boca!...: in conclusion,
se vive in mezzo a dei curiosi stampi.
- 7.
Gnanca apena lassái quei dò amigoni
dise el primo al secondo: el par vissùo
de lusérte!; lo gastu conossuo?
― Mi... gero inçerto, e si go i oci boni.
― Géri al Bar se parlava in tuti i toni
de.... discordie, epur mi no go creduo;
ma questo de securo s'ha savuo,
che, ormai da un pezzo, no gh'è più milioni.
― Per altro, in vila, quando i va a trovarlo:
corte bandía; tavola bona e pronta
senza bisogno afato de avisarlo....
― Ma va là corte!!...; lassa che te conta:
tornando l'altro dì l'amigo Carlo
el ga disnà da nù per farghe zonta.
