- 16.
Quel che riscciè sora una carta, siori,
zoghélo su l'industrie ― oh nobil zogo! —;
a l'artesan ghe manca el fero, el fogo,
el marmo, el legno a far capolavori....
La semenza del ben, cascà sui cuori
bisognosi de agiuto opur de sfogo,
dà benéssare e pase in ogni logo:
amor fa amor ― l'ha dito i gran dotori ― .
Anca perdessi, no butarè via
da stupidi, da zente senza cuor;
quele pérdite xe un'economia,
perchè, giovando el prossimo, s'impara
a tagiár le raíse al malumor,
e l'avegnir sempre de più se scciara.
- 17.
Se scciara l'avegnir?... Nissún ne sente
e, fra de nu, xe megio parlar sccieto...;
me par che sto paese benedeto
cambia de gusti tropo façilmente.
Un zorno el presta fede a çerta zente
che de sognar gaveva el gran difeto
conquiste e imperi, senza un bon conçeto
dei loghi e del bisogno; e po' el se pente;
a le prime batoste el se avilisse
come fa le donéte; el buta in tera
quei idoli, el li pesta e maledisse....
Coi moderati ancuö; coi radicali
doman, e intanto nol vede la guera
sorda che fa a la patria i clericali.
