- 24.
Fortuna immensa de 'sto bel paese,
razza che vien dai Conti de Moriana,
fornía de pugno saldo e mente sana,
chi pol contar le nobili to imprese?
Senza de ti fin quando mai sospése
podéa star le speranze; e ben luntana
saría da nù la libertà italiana,
o ferma ancora in tera piemontese!
Opara toa, se, al bon momento, caldi
d'amor patrio ga avúo l'istessa fede
'te l'unità Mazzini e Garibaldi;
e in vint'ani ― o miracolo! — s'ha visto,
cò a un Galantomo el popolo ghe crede,
far de l'indipendenza el somo aquisto.
- 25.
Líbari e uníti come una famegia
granda e potente, l'ora ormai xe questa
de vardár cossa che da far ne resta:
e no xe poco!. El popolo a la Régia
col cuor su i lavri ciaro 'l ghe conségia
a trátar da nemigo chi calpesta
fede e patria; a voltar orécie e testa
verso i fradei che in tuto i ne somegia
e, divisi, ne ciama. A chi lavora
come scciavi e xe fonte de richezza
el vol securo 'l pan quando vien l'ora
bruta che no i pol più da la veciezza,
«perchè dal ben che ghe ne salta fora
le istituzion i çitadini aprezza.» 1
- ↑ Parole del Gran Re.
