- 28.
Quel zorno po' che ocor un deputato,
sálvite da calunie, da improperie!
i lo taca su tute le materie;
el bon omo deventa un selerato.
Se 'l vien proposto da le zente serie:
dái ch'el xe un “forcaiuolo„; al candidato
de staltri i va disendo che l'è mato,
cò no i ghe trova fora altre miserie,
e l'omo sempre riverío, stimà,
fin ch'el restava un çitadin qualunque,
't un báter d'ocio el xe belo e infamà;
el perde la so quiete, el bon conceto
per ambizion o debolezza...: dunque,
'sto Parlamento, xelo maledeto?
- 29.
Sicome no se pol mandarli via
quei çinqueçento e tanti ciaciaroni,
pensemo a sciéglier galantomenoni
incapaçi de far 'na porcaría,
che favorissa i çitadini boni
e no se liga mai a la genía
dei sèteféde, o a queli che voría
aver da l'alto crosete e crosoni.
Pol far del ben el deputato e molto,
quando la zente co' rason se lagna,
e 'l deve, almanco, dar a tuti ascolto.
Ma ocor un omo giusto, indipendente,
cortesan, dove tanti in pompa magna
ciáciara sempre... e no conclude gnente.
