- 34.
Lo so anca mi; fa rabia cò se vede
messi sul candelier dei tipi bruti;
a çerte múmie scapelarse tuti,
anca chi le conosse e no ghe crede.
Fa schifo un pèzzo grosso che de agiuti
va in cerca fra persone in malafede,
s'el parla insieme, o — pêzo — el ghe conçede
la so amiçizia e i relativi fruti!
Xelo decoro, xela probità
a çerti tali strénzerghe una man
ch'el tribunal per ladra ga bolà?
Quanto dirghe a l'onesto poaro can:
tuto quel che ti vol ti gavarà
façendo la canagia e 'l zarlatan.
- 35.
Queli faría bon viso a un arfasato
che da dies'ani e più fusse scapà,
per schivar la preson, da la çità
e vissudo da siór zoso de Stato.
Dispôsti a compatír ogni pecato,
no i vol pensar se qualche desgrazià
da quele trufe sia stà rovinȧ,
sia morto a l'ospeal, deventà mato.
Sfaciatagine ocór; a tuto el resto.
remédia el tempo; l'omo scorda tuto
per campár senz'afáni, col pretesto
d'esser mánega larga. À un muso bruto
lu el fa lôgo; el trascura l'omo onesto,
cavandose 'l capelo a un farabuto.
