- 36.
Sôna un verso cussì: no te curar
de lòri; varda e passa; dunque avanti
fra sta massa de ludri e de birbanti
senza voltarse indrío, senza vardar;
come se ne tocasse d'incontrar
spetacoli schifosi, rebutanti,
ch'el stômego sconvolze a tuti quanti
e ' l rèbegolo mete de scapár.
Póvari o sióri, ognun pôl far del ben.
ma a la miseria per disgrazie e scônta
vada intiera la nostra compassion.
A una parola torna el cuor in sen;
xe salvezza una man pietosa e pronta...:
ai canagie el disprezzo e l'aversion.
- 37.
La perla vien da l'óstrega malada,
come dal cuor de nù la carità;
gema che no ga prezzo, se la dà
la man de una persona tribolada.
Chi sta in te l'ozio tuta la zornada
e no pensa al dimán come 'l sarà,
xe vera scciuma de la soçietà,
ma 'l bródo bòn stà in fondo a la stagnada!
Solo chi sofre e pena senza colpa
xe una creatura pronta al sacrifizio
e sa che sèmo tuti de una polpa.
Ma queli che regala i do soldeti
co' man distrata, fa coragio al vizio
e lassa in tera i veri povareti.
