- 38.
I nostri noni, in vita o in testamento,
ga donà some grosse ai desperai.
Strupii, orbi, putéi, veci, malai
anca adesso se agiuta ogni momento.
Ghe xe milioni che no dà provento
conveniente, o vien mal aministrai;
l'Asilo fa paura ai desgraziai
che no i vol esser confinải là drento.
Acatoni, ma líbari, sporzendo
la man per strada i ciapa quel che ocór
― oziosi ― a viver ben zorno per zorno;
e Sindaçi e Prefeti ― no vedendo
la piaga che fa rabia e strenze 'l cuor ―
xe causa prinçipal del nostro scorno.
- 39.
Portêmo pur un omo de giudizio
de Sindaco o Assessor sul caregon...:
lù ― insospetío de far un tombolon ―
el tiol l'eredità col benefizio
de l'inventario; e questo xe un indizio
de furbería. Ma zà gnente de bon
se fa cò manca i bezzi, e Pantalon
nol xe sempre disposto a far servizio.
Se la barca, a seconda, va bel belo,
i lassa in pase i remi, e: sempre avanti
co' i sistemi del secolo passà!.
Pur ch'el timón i tegna del batelo,
i zoga a tira e mola tuti quanti...:
farà de novo quei che vegnirà.
