- 42.
Bagni marini, opur Colonie Alpine...:
remedii de passagio e scarso efeto!
Quando el nasse malsan, o ch'el fioleto
nol ga bon late a tempo e medesine,
el tènde presto o tardi a un bruto fine;
e come 'l contadin co' un'albaréto
fa tuti i sforzi perchè 'l créssa dreto,
cussì s'ha d'arlevár le creaturine.
Vôdi i ospeali, vien in sta maniera
una generazion bela, robusta;
pronta a un lavoro serio in pase e in guera;
útil per ela e per i altri; giusta;
franca; piena de cuor; de la so tera
inamorà, ch'el bôn e 'l belo gusta.
- 43.
Ma chi sa misurar perfetamente
la conseguenza del levár da strada
e d'istruir la picola masnada
xe i preti; e i sciéglie i mègio, se no gnente.
Dovaremo pentirse amaramente
d'averghe lassà far 'sta restelada
ai furbi che de spénder no ghe bada
per farghe concorenza a st'altra zente
dal drapo rosso e negro. Queli e questi
ai so coscríti no i ghe dirà mai
che va 'l ben del paese avanti a tuto;
che se pol esser fior de omeni onesti
senza farse santóci o scalmanái,
e che un per l'altro s'ha da darse agiuto.
