- 2.
Se, per fortuna, posso viver chieto
luntan da impieghi, da comerçi e brighe,
restarò a vegetar in fra le spighe
come un gambo de logio maledeto?
No xe un'óbligo vérzer l'inteleto
a le idee sane e farle a tuti amighe?,
smascarar i birbanti e le vessighe
sgionfe che ga, de fora, un bel aspeto?
E cossa importa se le mie parole
contarà storie vecie come 'l mondo,
cò gnente gh'è de novo soto el sole?
Mi, a dirghe a tuti el soo, no me confondo..:
s'anca m'intende poche anime sole,
vôgio svodar el saco fin in fondo.
- 3.
Che delizia zirár per la campagna
da natura infornía co' tanto amor;
tavolozza che impasta ogni color,
matina e sera sempre descompágna!
L'acqua core via muta, opur se lagna;
i oséi solfégia in ciave de tenor;
tera, erbe, fiori manda bon odor
col sol e co' la brosa che li bagna.
O ristoro del corpo, o paradiso
de l'anima che sogna e cerca el belo;
balsamo per i cuor che xe malái!
O loghi che riscciára un tetro viso,
dove al vecio ghe par d'esser putélo..
campi beati, un Dio ve ga creai!
