Sta pagina la xe stà trascrita, ma la gà ancora da vegner rileta.
Perchè me par de vèdarte
Indiferente
A l'amor mio frenetico,
Sincero, ardente;
Perchè, se mi te ciàcolo
De l'avenir...
Te vedo andar in còlera
E impalidir!...
Disendo che xe inutile
Parlar de questo...,
Chè mi za co le fèmene
Me stufo presto!...
Che mi sia stà volubile
El xe afar noto...,
Ma prima de conosserte
E restar coto!
Adesso mi son stabile
Ne l'amor mio...
Perchè mi in ti go un Anzolo
Mandà da Dio...
Perchè ti xe un Arcanzolo
Calà dal cielo...,
Perchè per ti, mia vìscere,
Perdo el çervelo!
Dunque, tesoro, credime
A la parola:
Mi no son più quel discolo...,
Amo ti sola!...