Sta pagina la xe stà trascrita, ma la gà ancora da vegner rileta.
Sospirando,
Palpitando...
Ti me disi co rossor:
― No!... Gnancora
No xe ora
De dar basi... per un fior!... ―
Perchè basi, scherzi e fiori,
Co se xe da maridar,
I xe i pezo traditori
Che se possa imaginar!...
E le pute de bon sesto
No le ga forse rason
Se, disendo: ― Tropo presto! ―
Le ve dà la so lezion?...
Ahi!... No posso più tocarte,
Nè sfiorarte
Quel bochin;
Nè slanzarme per ciaparte,
Per donarte
El mazzetin...,
Chè, tremando,
Sospirando,
Ti me disi co rossor:
― No!.. Gnancora
No xe ora
De dar basi... per un fior! ―