Pagina:Delli componimenti diversi di Carlo Goldoni 1.djvu/125

18Lugr. Caspita, parlè ben, Siora Pasqueta!
     Ste belle cosse chi ve l'ha insegnae?
Pasq. Le ho sentie a dir ste cosse dal Poeta;
     Mi gh'ho bona memoria, e le ho imparae.
Lugr. Laoreu, frascone, o toghio la baccheta?
     Vardele là, ste misere, ¹ incantae.
Pasq. Chi no s'incanterìa, cara Lugrezia?
     Sti Novizzi, ha incantà meza Venezia.

19Lugr. Animo, deghe drio; via da valente,
     Fenimo avanti sera sto laorier.
     Chi no fa presto, no vadagna gnente.
     No gh'è più da far ben in sto mistier.
     Ogni dì per Venezia a dir se sente:
     Xe pien de ² Conzateste ogni Sestier,
     E po per sparagnar quattro gazzete, ³
     Tutte fa scuffie, e tutte fa stolete. ⁴

     20Se in ste occasion co un poco de giudizio
     No se se fa la ponga, ⁵ la va mal;
     Cara Pasqueta co sto Sposalizio
     Gh'ho speranza, che femo carneval.
     Inventerò ben mì col mio caprizio
     De le galanterie, che poco val;
     Per farme pagar ben zà sò l'usanza;
     Basta dir, che la moda xe de Franza.

     21Basta, che i primi merli sia perfetti,
     E me contento de far sù, e sù;
     I segondi più ⁶ tondi, e più laschetti
     Farò, che i sia, per vadagnar de più.
     Anca nù femo i nostri negozietti,
     Za quei, che compra, se riporta a nù;
     E se ai marcanti demo del vadagno,
     Li podemo comprar con del sparagno.

1. Da poco.
2. Conciateste si dice ad una, che fa i piccioli adornamenti per Donne.
3. Moneta che vale due soldi.
4. Palatine.
5. Metter da parte, profittare.
6. Meno fini, e più deboli.