Pagina:Delli componimenti diversi di Carlo Goldoni 1.djvu/198

24Salta suso una Donna in cao de tola ¹
     De settant'anni, e forse più; la dise:
     Questa, Sior Carlo, xe una gran parola,
     Sti Matrimonj el Ciel li benedise.
     Ma per mì, saria meggio viver sola.
     Gh'ho un cattivo marìo, le mie raise. ²
     Salta suso el mario: meggio per mì,
     Che ti fussi crepada almanco tì.

25A rider s'ha sentio tutto el Burchiello
     A sto pensier sì spiritoso, e vago.
     In tanto caminevimo a bel bello,
     E se scoverze el Campaniel d'Oriago. ³
     Tutti me dise: seguitè, fradello.
     Torno al fil del discorso, e tutti appago;
     Che propriamente ardeva da la voggia
     Del novizzo parlar, che xe una zoggia.

26Prima de tutto ve dirò, che el xe
     (Seguito a dir) ne la più bella età.
     Zovene senza barba, no a la fè, ⁴
     Che nol me piase un omo maridà,
     Ma gnanca vecchio che nol sia, perchè
     Vecchio con zoventù no se confà.
     Una Sposa per far lieta, e contenta
     L'ha da esser cussì, giusto su i trenta.

27E se sa, che per cento, e più riguardi,
     Più zovene ha da esser la consorte,
     Perchè l'omo s'invecchia assae più tardi
     Per natura più vegeto, e più forte.
     Tor una vecchia un zovene, Dio guardi,
     L'incorrerave quella brutta sorte
     De veder presto el povero marìo ⁵
     D'un matrimonio disugual pentio.

1. In capo di Tavola.
2. Le mie raise è termine d'amicizia, come se dicesse: caro amico ec.
3. Villaggio sulla Brenta.
4. No per mia fe.
5. Marito.