Tutta el l'hà vista, ma principalmente
L'hà vardà fisse le Tende Latine;
E co quelle Palpiere sì potente,
Che d'ogni pensier nostro xè indovine,
El vede Sier Goffredo molto ardente
De mandar i nemighi à far fassine,
E che à Gierusalem sempre l'è intento
Senza stimar commando, Oro, nè Arzento.
El vede Baldovin, che'l ghà la mira
D'arrivar sempre à una mazor grandezza;
El vede el gran Tancredi, che'l sospira
Per causa d'una femenil bellezza;
El vede Boemondo, che'l razira
Mille pensieri pieni de saviezza;
E ch'in Antiochia'l vuol far niove usanze,
Liesene niove, e niove costumanze.
Mà'l lo vede in sta vogia tanto saldo,
Che più nol pensa dar à i Turchi Rotte;
El vede quel bravazzo de Rinaldo,
Che l'hà sempre gran vogia de dar Botte;
El vorria, che vegnisse un può de caldo,
Che se podesse scomenzar le Frotte;
El vede, che ogni volta dà i pareri
De Guelfo xè diretti i so pensieri.
Mà doppo, che'l Paron ghà visto in drento
De questi, e diversi altri el cuor, e'l Petto,
L'hà chiamà fuora d'altri mille, e cento
Gabriel, che xè drian del primo eletto;
Questo xè quello, che da ogni momento
Per nù altri fa l'Ambassador diletto;
Questo de Dio i comandi à i paesi nostri,
E questo à Dio ghe porta i Pater nostri.
A questo Dio ghe dise. Da mia parte
Vaghe a dir à Goffredo; Cossa fastu?
Perche hastu messo l'Arme dà una parte?
Perche à chiappar Gierusalem no vastu?
Che se fazza Consulta, e à parte, à parte
Dighe, che lù'l voi Capitanio; Sastu?
Dighe, che mì cusì ghò fatto in Cielo,
E ch'i altri là no farà manco un pelo.
L'haveva a pena el so parlar fenio,
Che à obedirlo Gabriel xè tutto intento;
E per far quel, che ghe commanda Dio,
D'agiere'l se fà un corpo in t'un momento;
Davanti el Viso, la schena da drio
El se fà co maestoso portamento,
E'l mostrava d'aver circa tre Lustri,
E circondai da raggi i cavei lustri.
