Questi, che ve diseva i è mille in ponto,
E mille ghe n'è drio, che in tutto al vivo
I ghe somegia à i primi, e ogn'un xè pronto
E lesto a declinar sempre el dativo;
I xè tutti Normandi, e i rende conto
A Roberto so Prencipe nativo;
Vien pò, co dise i Padoani, al paro
Do Vescovi Gugielmo, & Ademaro.
De scambiar questi hà buo sto genio fiero
La Mitra in Elmo, e 'l Pastoral in Spada,
E in pè de coltivar la Vigna à Piero,
I semena le Teste per la strada;
La so zente Gugielmo in te l'impero,
E in la Città d'Orange el l'hà sunada;
L' altro l'ha chiolta in Poggio, e si no mento
E l'uno, e l'altro i ghe n'hà quattro cento.
A vegnir doppo Baldovin se vede
Co i Colognesi soi, e del Fradello,
Perche Goffredo à so fradel ghe i cede
Adesso, che l'hà bù posto più bello.
El Conte de Carnuti à lù succede,
Homo de gran braura, e gran Cervello;
Con el Sior Conte ghe n'è quattrocento,
E Baldovin ghe n'hà mille, e dusento.
A questi vien drio Guelfo un Sior potente
Dalla Fortuna, e dal merito alzao,
Questo per via del Pare xè parente
De quei, che in Este el Regno ghà fondao,
In te'l commando doppo, e in te la Zente
Della Casa Guelfona el s'hà missiao,
La Carintia 'l governa, e quella brava
Terra, che Svevi, e Reti dominava.
Quest'era Dimissoria de so Mare,
Ma con el so valor'el l'hà slargada;
De quà el se cerne le so Zente Care,
Che no stima i pericoli una snada;
Queste costuma à far, Trinche Compare
Quando che'l tempo xè dell'Invernada;
Co i s'hà partio i giera cinque mille,
Mà i Persiani ghe n'hà mazzao tre mille.
Se vede dopo quei della Brabanza,
Olanda, e Fiandra, de zentil figura,
Dove la Mosa, e'l Reno fa missianza
Co l'Acque salse, e in mar se trasfigura;
Quei, che a la riva stà gha per usanza
Viver sun'Arzeri alti per paura
Del Mar Oceano, che l'è fiero à segno,
Che'l sarà bon de sobissar un Regno.