Cinque mille el Sior Steffano d'Ambuosa
De Turs, e Blesse doppo ghe ne mena;
Sta Truppa no xè tanto valorosa,
Si ben, che l'è de Tattare assae piena;
La terra xè zentil, e delettosa,
E anca la Zente xè de puoca vena;
In prima i dà con furia imbestialia
Quattro vogae, ma presto presto i Sia.
Alcasto è'l terzo, che una volta armao
Sotto Tebe xè stà co la so Fragia,
De i Svizzeri sie mille l'hà menao,
Che de i Castelli Alpini xè Marmagia;
E quei Ferri, che prima i hà doperao
In Campagna, i li dopera in Battagia;
E co quelle Manasie da Villani
I desfida i più bravi Capitani.
In ultima se vede la Bandiera,
Che xè segnada de le do gran Chiave;
Camillo è'l Capitanio, e sette miera
Xè le so Zente ben'armae, e brave;
Alliegro per poder in sta maniera
Far quel, ch'ogni Christian far doverave;
E far veder, ch'è giusta quella lode,
Che co i Taliani vuol, à tutti i puode.
Mà zà giera fenij tutti i Boldoni,
E tutti haveva fatto la Parada;
Quando Goffredo chiama i Caporioni,
E à bon conto i ghe intona sta sonada:
Domattina vorria, Siori Paroni,
Ogni Filla à bonora parecchiada;
Perchè a Gierusalem, se mai podemo,
Vogio, che à Cavalier sorazonzemo.
Siè donca lesti tutti, e parechieve
Al Viazo, alla Battagia, e alla Vittoria;
Dà un parlar cusì franco ogn'un riceve
Anemo, e forza, e quasi Vanagloria;
No i vede l'hora darse della Neve
Co i Nemighi seguri d'haver gloria;
Mà siben, che Goffredo fà el Profeta
L'hà ben paura, mà'l la tien secreta.
Perche un certo Tintin el ghà sentio,
Che'l Rè d'Egitto vien verso le Mure
De Gaza co un'essercito fiorio
Per far le Terre de Soria sigure;
Nè'l crede, che quel Rè ghabbia fenio
De far delle so solite braure;
Mà'l lo aspetta Nemigo, e co sta mente
El parla à Enrico assae so Confidente.
