33.
E adesso in sta maniera so tratà
Dopo tante fadighe che go fato,
E el premio che m'ho in guera guadagnà
Robarmelo ti vol, toco de ingrato!
Quando che i Greghi Trogia chiaparà,
E de la division se farà el pato,
So cossa nassarà, siben che in fin
Mi fazzo qua da Zan e buratin.
34.
Sempre, quando se fa le division
De la roba che s'ha portada via,
Xe toa la prima parte, el megio, el bon;
L'ultima, la più picola, xe mia;
E go da esser contento, contenton.
Fradei, tornemo presto presto a Ftia:
Piutosto a casa mia a magnar polenta,
Che sfadigar per quei che me insolenta. -
