37.
Pensè vualtri, se Achile el buta fogo
Sentindose tratar in sta maniera.
Nol savea se quietarse, o farse logo
Per destinarlo là morto per tera.
El tol in man la spada, e mi ghe zogo
Che el lo sbuelava proprio, se no gera
Minerva corsa zo da cosa soa,
Che svelta lo tirasse per la coa.
38.
Sconta a tuti la gera capitada
E vista Achile la gaveva solo,
Perchè co el ga sentido la tirada
L'avea trato un scorlon e voltà el colo.
Siben che no la fusse petenada
Dai ochi conossua el la ga de svolo,
E el ghe domanda: - Cossa vienstu a far,
Vienstu forsi a sentirme strapazzar? -
