43.
- Fiol de una negra, infame Agamenon,
Bon solo che da ofender e insultar,
Par a sentirte che ti si' Sanson,
Ma quando che sul campo xe da star,
Se vede che da gnente ti xe bon.
Se ti trovi el to conto a sgranfignar
A chi voria farte sbassar la cresta,
La rason chiara e tonda la xe questa.
44.
Ma se roba da cani e zente bassa
No fusse quela che te serve ti,
No ti faressi, no, tanto manbassa;
E quel che adesso ti m'ha fato a mi
Per fartela finir saria anca massa;
Ma se el destin la ga vossua cussì,
Sta atento ben a quel che te dirò,
Chè in do parole mi me spiegherò:
