67.
Una matina capita el vechieto
Col baston del so Dio, col so capelo,
Per rescatar coi bezzi, povareto,
La so puta Criseide, el so zogielo;
Ma Atride pien de rabia e de dispeto
El xe andà in furia, e te dirò che un pelo
Ga manca che partisse le sacerdote
Col muso pesto e co le coste rote.
68.
Brontolando el xe corso invelenà
A spifararghe tuto al biondo Dio.
Co le lagrime ai ochi el l'ha pregà
Che pagar el ghe fasse ai Greghi el fio;
E pur tropo el so Febo l'ha ascoltà.
Per nove dì a mandarne el xe andà drio
De le so frezze una tempesta suta;
Chè i Greghi e Atride se l'ha vista bruta.
