69.
De far che in consistori alfin se andasse
Me xe vegnua la bona ispirazion;
El perchè Febo i Greghi petufasse
Calcante n'ha spiegà, bravo strigon.
Che a casa soa Criseide se mandasse,
Tanto el se rassegnava Agamenon;
Ma de voler qualcossa impontiglià,
Contro de mi la rabia el ga sfogà.
70.
El me ga dito tondo che una schiava
A farme fora certo el vegnaria,
Che Briseide el voleva la più brava;
E infati me l'ho vista portar via
Dai so fanti che a tormela el mandava,
Subito che la soa gera partia...
Mare, prega per mi, cori da Giove,
Che fa vegnir el Sol quando che piove.
