87.
Arivai al so campo, i tira in seco
La nave, e tuti indove che voleva
A spassizar i và, o a bagnarse el beco;
Achile dal dolor el se struzeva,
De tuto smagonà, de tuto seco,
E da tuto e da tuti el se scondeva.
Ma dopo undese dì xe vegnuo quelo,
Che i Dei xe stadi de ritorno in Cielo.
88.
Tetide zo dal leto presto, presto,
Co xe sta apena dì, la xe saltada.
Siben che tuta note poco in sesto
Senza dormir un fià la fusse stada;
Per amor de so fio, co tuto questo,
Da Giove, che fa i toni, la xe andada,
E la lo ga trovà solo, soleto,
Che el fumava in Olimpo un zigareto.
